Şuşanı bizim edən hünərvər kommandoslar

Bu şəkildə sırayla durmuş hərbçilər sıradan və sıravi əsgərlər deyil, onlar baş əsgərlərdir, müzəffər və hünərvər oğullardır.
Bunların o biri igid döyüşçülərimizdən bir fərqləri var: Şuşaya ilk qədəm basan bunlar olub. 
"Şuşaya ilk qədəm basmaq" dildə asan görünür - adamıın gözü qarşısında qırmızı xalı canlanır.
Bu əsgərlərin yolu isə qırmızı xalı üzərindən keçməyib, döyüş dostların al qanına bələnmiş torpağın, qayaların üstündən keçib. 
Bunlar Şuşaya öz ağırlıqlarında yüklə, qayalardan dırmaşaraq, qucaqlarında yaralı əsgər yoldaşlarını daşıyaraq, giriblər. 

Özlərindən qat-qat çox və daha rahat , əlverişli mövqelərdə daldalanan düşməni qəfləti, gözlənilməz həmlə ilə yaxalayan, üzbəüz, əlbəyaxa savaşda qabaqlarına çıxanı, yumşaq desək, zərərsizləşdirən bu "canavar" qardaşlar indiyədək heç yerdə danışmayıblar, heç yerdə görüntülənməyiblər.
Onların əsl kimliyini bir komandirləri bilib, bir də baş komandanları. 
Bu gün Ali Baş Komandan ona görə bu şəxslərlə birlikdədir, ona görə onları özüylə Şuşa ziyarətinə aparıb ki, gerçək qəhrəmanların kimliyini bilir. 

Bunlar ölümün gözünə dik baxan, ondan qorxmayan rəşidlərdir. Ölümə gedən kamikadzelərdən üstün oğlanlardır bunlar. Kamikadzelər halallaşıb ölümə gedirdilərsə, bunların daha bir ağır riski vardı - yaralanıb əsri düşmək və düşmənin hər cür alçaqlığına, işgəncəsinə məruz qalmaq. 
Amma şükür ki, bu mərd, qıvraq, fəhmli, iri zəkalı, tarım əzələli qardaşlar düşmənə göz açmağa imkan vermədilər və biz, bir də gözümüzü açdıq ki, artıq Şuşadayıq. 
Eşq olsun bu aslanları doğan analara da, onlara "aslanım" deyən atalara da, "Vətənə canım fəda" deyən özlərinə də.

Nə mutlu bizə ki, belə oğullarımız var və onlar düşmənin kürəyinin təkcə tatamidə yer vurmurlar, lazın gələndə torpağa da sürtə bilirlər.(musavat.com)
Çap