Xəzər dənizi quruyur: ÖZƏL FOTO

Xəzər dənizinin səviyyəsi enməkdə davam edir. Paytaxtda bu səhnə daha qabarıq şəkildə nəzəri cəlb edir. Belə ki, Dənizkənarı Milli Parkda olan Musavat.com əməkdaşı suyun səviyyəsinin kəskin şəkildə enməsi nəticəsində sahil boyunca daş və torpaq qatın üzə çıxmasının şahidi olub.
Bəzi ərazilərdə isə vaxtilə suyun altında qalmış dəmir borular və digər metal materiallar üzə çıxıb.
Qeyd edək ki, tarix boyunca Xəzər dənizində suyun səviyyəsinin enməsi və qalxması dəfələrlə müşahidə olunub. Ötən ilin sonlarında isə almaniyalı və hollandiyalı tədqiqatçıların “Nature Communications Earth & Environment” jurnalında yayınlanan araşdırmasında enmə təhlükəsindən bəhs olunmuşdu. Bildirilirdi ki, 2100-cü ilə qədər Xəzər dənizinin səviyyəsi 9-18 metr enəcək, nəticədə bu, bir sıra problemlərə, həmçinin ekoloji fəsadlara səbəb olacaq, üstəlik, dəniz hövzəsinin sahəsinin 23-34 faiz azalması regionun iqtisadi və siyasi stabilliyinə təsir göstərəcək.
Xəzər dənizində suyun səviyyəsinin aşağı düşməsi buxarlanmanın artması, illik yağıntının normadan aşağı olması, eyni zamanda qışda dəniz buzunun yoxa çıxması ilə izah olunur.
Xəzərin suyunun azalması dənizdəki adaların da ərazisini genişləndirib, həmçinin yeni adaların “boy” verməsinə səbəb olmaqdadır.(musavat.com)













Çap