Əliyev şəhidlərin xatirəsi önündə dünyaya bu mesajları verdi – BAKI HÜCUMDA OYNAYIR

"Müharibənin ildönümündə hələ də Qarabağla bağlı təhdidlər, risklər mövcuddur. Prezident İlham Əliyev Anım Günündə bu təhdidlərlə bağlı Azərbaycanın mövqeyini təkrarladı, lakin diqqətçəkən məqam təhdidlərə qarşı atılacaq addımları bu dəfə şəhidlərin xatirəsi önündə elan etməsi idi”.
Sfera.az xəbər verir ki, bu sözləri siyasi şərhçi Asif Nərimanlı deyib.
 O, bildirib ki, rəsmi Bakının Qarabağla bağlı mövqeyi dəyişmir, lakin bu dəfə bir qədər də sərtləşdirilir:
"Əliyev bildirir: "Azərbaycanda "Dağlıq Qarabağ” adlı inzibati ərazi mövcud deyil və əgər kimsə "Dağlıq Qarabağ” adlı ölünü diriltmək istəyirsə, onu öz ərazisində diriltsin, öz ərazisində "Dağlıq Qarabağ” adlı qurum yaratsın, respublika yaratsın, cəmiyyət yaratsın. Biz də onu tanıyarıq, ancaq Azərbaycanda yox! Bu məsələ öz həllini tapdı. Bunu mən deyirəm - Azərbaycanın Prezidenti, Silahlı Qüvvələrin Ali Baş Komandanı. Hər kəs bu sözlərlə hesablaşmalıdır və hesablaşacaqdır”.
Prezidentin bu sözlərindən çıxan nəticələr budur:

1. Azərbaycana qarşı separatizmi körükləyənlərin özləri eyni halla üzləşə bilərlər.

2. Ölünü diriltmək istəyənlərə qarşı Bakı da eyni taktikanı seçə bilər: bu, "hücum diplomatiyası”na əsaslanan mesajdır.

3. Bakının hərbi güc addımı təkcə Ermənistana yox, "Dağlıq Qarabağı” diriltmək istəyən bütün tərəflərə şamil edilə bilər: Əliyev ordunun komandanı kimi xəbərdarlıq edir.
Ekspertin sözlərinə görə, xəbərdarlığını şəhidlərin xatirəsi önündə edilməsi həm də şəhidlərin ruhu önündə verilən söz idi:
"Anım Günündə şəhidlərimizin əziz xatirəsi önündə bir daha deyirəm, əgər biz görsək ki, erməni faşizmi baş qaldırır, əgər biz görsək ki, xalqımıza, dövlətimizə yeni təhlükə mənbəyi yaranır, heç tərəddüd etmədən erməni faşizminin başını bir daha əzəcəyik. Bunu hər kəs bilsin!”, - Əliyev deyir.
Əliyev bununla Qarabağla bağlı geriyə dönüşün olmadığı, heç bir güzəştin olmayacağı mesajını bu məsələdə maraqlı olan hər kəsə bəyan edir.
A.Nərimanlı Prezidentin çıxışındakı iki önəmli mesajı qeyd edib:
"Birincisi, müharibənin ildönümündə xəbərdarlığı Ermənistana yox, üçüncü tərəflərə etdi: bu, "İrəvan artıq tərəf deyil, tərəf olmaq istəyənlər də Ermənistana qarşı atılan addımlarla üzləşəcək” deməkdir.
 İkincisi, bölgədə və Azərbaycan-Ermənistan münasibətlərində gündəliyi formalaşdıran tərəf Bakıdır, yəni "regionda bizimlə hesablaşmalısınız”.

 
  Çap